|
VISUELE
KUNS - SKILDERKUNS
Skilderkuns is die kuns waarin verf, kleurstof, kleur of enige
ander medium op 'n tweedimensionele, voorbereide plat oppervlak,
soos skilderdoek, op 'n verteenwoordigende, verbeeldingryke
of abstrakte wyse aangewend word. Die elemente van ontwerp
word op verskeie maniere gebruik om gewaarwordings van volume,
ruimte, beweging en lig voort te bring. Skilderkuns is meer
'n verstandelike proses as 'n tegniese kuns, en 'n goeie skildery
is nóg 'n siellose nabootsing van iets nóg 'n 'ingekleurde'
tekening. Klem op die uniekheid van die geskilderde beeld,
sowel wat die fisiese aard as die geïndividualiseerde, mensgemaakte
inhoud daarvan betref, is 'n hoeksteen van hierdie kursus
by die Kunssentrum.
Graad 10: Leerders word bekend gestel aan die gebruik van
akrielverf as 'n medium met 'n fokus op basiese formele elemente
as deel van elke projek.
Graad 11: Daar word van leerders verwag om 'n benadering te
volg wat meer eksperimenteel is ten opsigte van die onderwerp
en die gebruik van verfmateriaal.
Graad 12: Daar word van leerders verwag om die verfmedium
met selfvertroue te gebruik asook om 'n duidelike individuele
en konseptuele benadering tot hul onderwerp te ontwikkel.
|
