|
ONTWERP
- TEKSTIELONTWERP
Talle kreatiewe prosesse en produkte word in die tekstielbedryf
gebruik. Tydens die onderrig van tekstielontwerp is dit belangrik
om leerders van al hierdie prosesse en produkte bewus te maak.
In hierdie kursus word drukprosesse soos lino, stensil en
skermdruk ontleed deur praktiese gebruik. Die belangrikheid
van teken en skets word beklemtoon en leerders word geleer
om met sensitiewe en akkurate waarneming te teken. 'n Estetiese
gewete word gekweek waarmee leerders verskillende standaarde
kan evalueer. Heersende ontwerpneigings word ontleed en praktiese
situasies soos binnenshuise versiering word gebruik om die
toepaslikheid van die vak te demonstreer.
Graad 10: Leerders word bekend gestel aan die formele elemente
van kuns en die beginsels van ontwerp. Hierdie basiese kennis
word gebruik in basiese oppervlaktoepassingstegnieke soos
aartappeldruk, vervilting, handverf en collagetegnieke.
Graad 11: Daar word van leerders verwag om die tegnieke wat
in graad 10 geleer is in kombinasies toe te pas, en 'n meer
gevorderde benadering tot oppervlakversiering word verwag.
Graad 12: Daar word van leerders verwag om meer individualiteit
ten toon te stel en om tegnieke toe te pas wat in spesifieke
projekte geleer is.
|
